الخليع و لاكريش

ناخد اللحم غير الهبرة و كنقطعها بحال القديد طويلة كيفما موضحين في الصورة اعلاه و كنملحها بزااايد الملح بزاف و نخليها تبات ليلة كاملة في التلاجة و لغد ليه ننشرها في الشمس نبقى ننشرها كل يوم حتى تنشف مزياان من الماء
ملي تيبس نغسلها من الملحة اللي درنا لها و نبخرها في الكسكاس حتى تطيب فهاد الاتناء نوجد الشرمولة فيها:
قزبر حبوب مهرمش مزيان
توم محكوكة
كامون
ابزار
سكينجبير
خرقوم
زعفران شعرة
زيت للخلط
الملح حتى نذوق اللحم و نشوف واش محتاج
)كمية العطرية حسب كمية اللحم)

نخلط كلشي و نشرمل اللحم و نبيتها في الشرمولة ليلة كاملة
نوجد كمية من الشحمة مطحونة عند الجزار
من بعد ما رقدنا اللحم ليلة كاملة الصبح ناخد طنجرة نوضع الشحمة تغلي مع الزيت حتى تذوب و نرمي فيها اللحم و نبقى مرة مرة نقلبها حتى نحس ما بقاش فيها الماء كاع غير الزيت
نخليها تبرد شوية و نعمرئها في سطل او اي اناء يمكن نحتافظو به
كيبقى لاكريش لتحت في الطنجرة نعمروه في طاسة اخرى و نحتافظو به يلا بغينا نعمرو به المسمن و لعدة استعملات